Oversea Myanmar Community
Would you like to react to this message? Create an account in a few clicks or log in to continue.

ကေအန်ယူ ငြိမ်းချမ်းရေး ပြန်ဆွေးနွေးမည်

Go down

ကေအန်ယူ ငြိမ်းချမ်းရေး ပြန်ဆွေးနွေးမည် Empty ကေအန်ယူ ငြိမ်းချမ်းရေး ပြန်ဆွေးနွေးမည်

Post  soeaung Wed Mar 25, 2009 6:57 am

ကရင်အမျိုးသား အစည်းအရုံး (ကေအန်ယူ) ၏ ဒုဥက္ကဌ စောဒေးဗစ် တာကပေါက မြန်မာစစ်အစိုးရနှင့် ငြိမ်းချမ်းရေးကိစ္စ စကားပြောရန် ထိုင်းနိုင်ငံက ကြားဝင် တိုက်တွန်းလာပါက လက်ခံမည် ဖြစ်သော်လည်း ပြင်ပ တနိုင်ငံတွင်သာ ဆွေးနွေးရေး ပြုလုပ်နိုင်မည် ဖြစ်ကြောင်း ဧရာဝတီသို့ ပြောသည်။

ကေအန်ယူ ငြိမ်းချမ်းရေး ပြန်ဆွေးနွေးမည် Knu-yuzo


ထိုင်းနိုင်ငံခြားရေးဝန်ကြီး Kasit Piromya က မြန်မာစစ်ခေါင်းဆောင်များနှင့် နေပြည်တော်တွင် တွေ့ဆုံခဲ့ပြီး နောက် ကေအန်ယူကို မြန်မာစစ်အစိုးရနှင့် ငြိမ်းချမ်းရေးအတွက် ဆွေးနွေးရန် တိုက်တွန်းမည်ဟု ပြောကြား လိုက်သည်။

စောဒေးဗစ်တာကပေါက “ကျနော်တို့အနေနဲ့ ငြိမ်းချမ်းရေးအတွက် စကားပြောဖို့ အမြဲ အဆင်သင့် ရှိနေပါတယ်။ ဒါပေမယ့် မြန်မာပြည်တွင်း မှာတော့ မဆွေးနွေးနိုင်ဘူး။ တခြား တနိုင်ငံမှာဆိုရင်တော့ လက်ခံမှာပါ” ဟု ဆိုသည်။

မကြာသေးမီက ထိုင်းစစ်တပ်သည် မဲဆောက်ရှိ ကေအန်ယူ စစ်ခေါင်းဆောင်များကို မြန်မာပြည်ဘက်ခြမ်းသို့ ပြန်နေရန် စာထုတ်ခဲ့သေးသည်။

မြန်မာ့အရေးလေ့လာသူ ကိုအောင်သူငြိမ်းက ယခုကဲ့သို့ ထိုင်းနိုင်ငံဘက်က မြန်မာစစ်အစိုးရနှင့် ငြိမ်းချမ်းရေး ဆွေးနွေးရန် ကေအန်ယူအား တိုက်တွန်းမည်ဟု ပြောခြင်းမှာ အာဆီယံမူအရ ဒေသတွင်း နိုင်ငံများ၏ နိုင်ငံရေး ကိစ္စရပ်များတွင် ဝင်ရောက်မစွက်ဖက်ရ ဟူသော အချက်ကို အကောင်အထည်ဖော်ခြင်းနှင့် ထိုင်းနိုင်ငံ၏ စီးပွားရေး ကိစ္စရပ်များကြောင့် ဖြစ်နိုင်ကြောင်း သုံးသပ်သည်။

ယခုလက်ရှိ အနေအထားအရ ထိုင်းနိုင်ငံသည် စီးပွားရေးအခြေအနေ ကျဆင်းမှုနှင့် ရင်ဆိုင်နေရသဖြင့် နှစ်နိုင်ငံ စီးပွားရေးပူးပေါင်းဆောင်ရွက်ရေးကို ဦးစားပေးနိုင်ခြေရှိသည်ဟု ကိုအောင်သူငြိမ်းက ဆိုသည်။

“ခု မြဝတီ - မဲဆောက် တံတားတစင်းလည်း ထပ်ဆောက်နေတယ်၊ အာရှလမ်းမကြီးလည်း ဖောက်ချင် နေတယ်။ ထိုင်းက သူ့နိုင်ငံရဲ့ စီးပွားရေးဘက်ကို ရပ်မလား ကေအန်ယူဘက်ကို ရပ်မလား ဆိုတာတော့ ပြောရတာ ခက်တယ်” ဟု သူက ဆက်ပြောသည်။

စောဒေးဗစ်တာကပေါကလည်း နှစ်နိုင်ငံကူးသန်းရောင်းဝယ်ရေးကိစ္စ အတွက် နယ်စပ် ငြိမ်းချမ်းရေးရရှိရန် ထိုင်းနိုင်ငံသည် မြန်မာစစ်အစိုးရနှင့် ပြဿနာဖြစ်လိုပုံမရဟု ဆိုသည်။

“စီးပွားရေးအမြင်နဲ့ ကြည့်မယ်ဆိုရင် ဒီအချက်က ထိုင်းအနေနဲ့ ကေအန်ယူကို မြန်မာစစ်အစိုးရနဲ့ စကားပြောဖို့ ဖိအားပေးတဲ့နေရာမှာ အဓိကကျတယ်” ဟု သူက ပြောသည်။

၁၉၉၀ နောက်ပိုင်းတွင် ကေအန်ယူသည် မြန်မာစစ်အစိုးရနှင့် ငြိမ်းချမ်းရေးအတွက် တွေ့ဆုံဆွေးနွေးခဲ့ဖူးသည်။ ကွယ်လွန်ခဲ့ပြီဖြစ်သော ကေအန်ယူ၏ ခေါင်းဆောင် ဗိုလ်ချုပ်ကြီး စောဗိုလ်မြသည် ၂၀၀၅ ခုနှစ်က မြန်မာစစ်အစိုးရ ခေါင်းဆောင်များနှင့် ငြိမ်းချမ်းရေးအတွက် ရန်ကုန်မြို့တွင် တွေ့ဆုံဆွေးနွေးခဲ့သည်။

“အဲဒီတုန်းက သူတို့က လက်နက်ချပြီး ပြန်ဝင်လာဖို့ ပြောခဲ့တယ်။ ဒါပေမယ့် ဒါက ဘယ်ဖြစ်နိုင်ပါ့မလဲ။ စစ်အစိုးရလို တရားဝင်မဟုတ်တဲ့ အစိုးရရဲ့ လက်အောက်မှာ ဘယ်လိုလုပ် ကေအန်ယူက နေလို့ဖြစ်ပါ့မလဲ” ဟု စောဒေးဗစ်တာကပေါက ဆိုသည်။

အကယ်၍ ကေအန်ယူအနေနှင့် မြန်မာစစ်အစိုးရနှင့် နိုင်ငံတွင်း၌ တွေ့ဆုံဆွေးနွေးရန် သဘောတူညီလိုက်ပါက စစ်အစိုးရက အသာစီးယူ၍ ပြောဆိုမည်ဖြစ်ပြီး တရားမျှတသော ဆွေးနွေးမှု မဖြစ်နိုင်ဟု သူကဆက်ပြောသည်။ ၎င်း၏ အတွေ့အကြုံအရ ယခင် ပြည်တွင်းဆွေးနွေးမှုများမှာလည်း တရားမျှတမှုမရှိခဲ့ဟု ဆိုသည်။

ကေအန်ယူ ငြိမ်းချမ်းရေးယူလိုက်ပါက တခြားသော အတိုက်အခံ အဖွဲ့အစည်းများအနေနှင့် အကြပ်အတည်း တွေ့နိုင်သော်လည်း မြန်မာစစ်အစိုးရသည် ကေအန်ယူ အဖွဲ့အစည်း တခုလုံး ညီညီညွတ်ညွတ်နှင့် တစုတစည်း တည်း ငြိမ်းချမ်းရေး ယူသည့် အနေအထားကို လိုလားလိမ့်မည်မဟုတ်ဟု ကိုအောင်သူငြိမ်းက သုံးသပ်သည်။

“သူတို့ကတော့ သွေးခွဲအုပ်ချုပ်တဲ့ ပုံစံကို သုံးမှာပဲ။ တချို့နေရာတွေမှာ အကြပ်အတည်း ဖြစ်အောင် လုပ်မယ်၊ တချို့ကိုကျတော့ အခွင့်အရေးပေးမယ်ဆိုတာမျိုး လုပ်မှာပဲ။ တပ်မဟာလိုက် ခွဲပြီး စည်းရုံးမယ်လို့ ယူဆရတယ်” ဟု သူက ဆိုသည်။

ထိုင်းနိုင်ငံသည် မြန်မာစစ်အစိုးရနှင့် ကေအန်ယူကြားတွင် ယခင်ကတည်းက ဝင်ရပ်ခဲ့ဖူးပြီး ဗိုလ်ချုပ်ကြီးခင်ညွန့် လက်ထက်ကလည်း အိမ်ရှင်အဖြစ် လက်ခံဆွေးနွေးခဲ့ခြင်းမျိုး လုပ်ပေးခဲ့ဖူးသည်ဟု ကိုအောင်သူငြိမ်းက ဆက်ပြောသည်။ ထိုင်းနိုင်ငံအနေနှင့် မြန်မာနိုင်ငံအရေးကို ပိုမိုကောင်းမွန်လာရန် ကူညီနိုင်သော အနေအထား ရှိသည်ဟုလည်း သူက သုံးသပ်သည်။

“ထိုင်းအစိုးရအနေနဲ့ တဘတ်သက် မဟုတ်ဘဲ စေတနာမှန်မှန်နဲ့ ဝင်လုပ်မယ် ဆိုရင်တော့ ကောင်းသွား နိုင်တယ်” ဟု သူက ပြောသည်။
soeaung
soeaung
Admin

Number of posts : 30
Registration date : 2009-03-07

Back to top Go down

Back to top

- Similar topics

 
Permissions in this forum:
You cannot reply to topics in this forum